பிரியா - பிரியா:

`பிரியா' திரைப்படம் சுஜாதா எழுதிய பிரியா நாவலை அடிப்படையாகக் கொண்டு எடுக்கப்பட்டது. ரஜினி, ஸ்ரீதேவி நடிக்கத் தயாரிப்பாளரின் கட்டுப்பாட்டில் இருக்கும் நடிகைக்கு ஏற்படும் சிக்கல்களை வழக்கறிஞர் ஒருவர் எப்படித் தீர்த்து வைக்கிறார் என்பதை மிகவும் விறுவிறுப்பாகப் படமாக்கியிருந்தார் எஸ்.பி.முத்துராமன். 

3 இடியட்ஸ் - நண்பன்:

சேத்தன் பகத் எழுதிய `ஃபைவ் பாயின்ட் சம்ஒன்' என்னும் நாவலை அடிப்படையாகக் கொண்டு இந்தியில் வெளிவந்த திரைப்படம் 3 இடியட்ஸ். அதனுடைய ரீமேக்தான் நண்பன். விஜய், ஜீவா, ஸ்ரீகாந்த் நடிக்க இந்தியக் கல்வி முறையைப் பற்றிய அவசியமான மெசேஜை மூன்று நண்பர்களின் கல்லூரி வாழ்வின் மூலம் அழகாகப் பதிவு செய்தார் இயக்குநர் ஷங்கர். 

காவல் கோட்டம் - அரவான்:

`அரவான்' திரைப்படத்தின் கதை சு.வெங்கடேசன் எழுதி 2011 ஆண்டுக்கான இந்திய சாகித்திய அகாதமி விருது பெற்ற காவல் கோட்டம் நாவலில் வரும் ஒரு துணைக் கதை ஆகும். ஆதி, தன்ஷிகா நடிக்கக் களவையும் காவலையும் வாழ்க்கை முறையாகக்கொண்ட எளிய மக்களின் கதையாக `அரவானை' தந்தார் இயக்குநர் வசந்தபாலன். 

ஒரு நடிகை நாடகம் பார்க்கிறாள் - ஒரு நடிகை நாடகம் பார்க்கிறாள்:

`ஒரு நடிகை நாடகம் பார்க்கிறாள்' திரைப்படம் 1971 ல் வெளிவந்த ஜெயகாந்தனின் `ஒரு நடிகை நாடகம் பார்க்கிறாள்' என்னும் நாவலை அடிப்படையாகக் கொண்டு எடுக்கப்பட்டது. இந்தப் படத்துக்கான வசனங்களையும் ஜெயகாந்தனே எழுதினார். லட்சுமி, ஸ்ரீகாந்த் நடிக்க ஒரு திரைப்படத்துக்கான செயற்கைத்தனம் கொஞ்சம் கூட தலைகாட்டாமல், முழுக்க முழுக்க எதார்த்தமாகப் படத்தை மிக அருமையாகக் கொண்டு சென்றிருப்பார் இயக்குநர் பீம்சிங். 

வசந்தகால குற்றங்கள் - 144:

`144' திரைப்படம் சுஜாதா அவர்கள் எழுதிய `வசந்தகால குற்றங்கள்' என்னும் நாவலை அடிப்படையாகக் கொண்டு எடுக்கப்பட்டது. சிவா, அசோக் செல்வன், ஓவியா நடிக்க மதுரையில் இருக்கும் இரு கிராமங்களுக்கு இடையே தடைப்பட்ட மீன் பிடித்திருவிழாவும், அதையொட்டிய திருட்டுகளையும், புரளிகளையும் பற்றிய படமாக `144'ஐ இயக்கியிருந்தார் இயக்குநர் ஜி. மணிகண்டன் 

உச்சி வெயில் - மறுபக்கம்:

`மறுபக்கம்' திரைப்படம் இந்திரா பார்த்தசாரதி எழுதிய `உச்சி வெயில்' என்னும் நாவலை அடிப்படையாகக் கொண்டு எடுக்கப்பட்டது. வேம்பு அய்யர் என்ற கதாபாத்திரத்தில் சிவகுமார் நடிக்க, அகில இந்திய ரீதியில், சிறந்த படம் என்பதற்கான தேசிய விருது (தங்கத்தாமரை) இந்தத் திரைப்படத்துக்குக் கிடைத்தது. நாவலின் ஆசிரியரான இந்திரா பார்த்தசாரதியே இந்தப் படத்தைத் தயாரிக்க சேது மாதவன் இந்தப் படத்தை இயக்கியிருந்தார். 

வெட்டாட்டம் - நோட்டா:

`அர்ஜுன் ரெட்டி' விஜய் தேவரகொண்டா `நோட்டா' வின் மூலம் தமிழுக்கு அறிமுகமாகிறார். எழுத்தாளர் ஷான் கருப்பசாமியின் `வெட்டாட்டம்' நாவலைத் தழுவி இத்திரைப்படம் எடுக்கப்பட்டிருக்கிறது. மேலும், முழுக்க முழுக்க அரசியல் சார்ந்த படமாக உருவாகியிருக்கும் இத்திரைப்படத்துக்கு, ஷான் கருப்பசாமியுடன் இணைந்து படத்துக்கான திரைக்கதையை உருவாக்கியிருக்கிறார் இயக்குநர் ஆனந்த் ஷங்கர்.

Thanks

Anandha vikadan